जुम्ला । जुम्लाको सिञ्जा गाउँपालिका–२ ले वडाभित्रका चार सय घरधुरीलाई घर बीमा गरिएको छ । गत वर्ष असोजमा अविरल वर्षाले बाढी पहिरो गई यहाँका अधिकांश घरमा क्षति पुगेको थियो । 

 प्रकृतिको प्राकृतिक प्रकोप आएमा सर्वसाधारणलाई राहत होस् भन्ने उद्देश्यले वडाका सबै घरधुरीको घर बीमा गरेको वडाध्यक्ष तीर्थ वडले जानकारी दिनुभएको छ।

कर्णाली प्रदेश समानीकरण अनुदानको बजेटबाट वडाले दुई लाख ५० हजार रुपैयाँ घर बीमाका लागि विनियोजन गरिएको थियो । ‘प्रतिघर तीन लाखका दरले शिखर बीमा कम्पनीसँग सम्झौता गरी घर बीमा गरिएको छ’ वडाध्यक्ष वडले भन्नुभयो– ‘अब बाढी–पहिरो, वर्षा र प्राकृतिक प्रकोपले घरमा क्षति गरेमा बीमा कम्पनीबाट सो बराबरको रकम सर्वसाधारणले पाउँछन् ।’

त्यही वडाले विपन्न बालबालिकाको स्वास्थ्य बीमा गर्न ५० हजार रुपैयाँ विनियोजन गरेको छ । वडाभित्रका अति गरिब र विपन्न बालबालिकाको स्वास्थ्य बीमा वडाले गर्ने भएको हो ।