कालीकोट । युवा अभियन्ता राजेन्द्र अधिकारीलाई आईकन अफ कर्णाली अवार्ड २०२४– बाट सम्मान गरिएको छ ।

दैलेखको भगवतीमाई गाउँपालिका ४ मा जन्मिएका युवा अभियन्ता अधिकारीलाई कर्णाली प्रदेश सरकार , सामाजिक विकास मन्त्रालय र नेपाल युवा परिषद्ले संयुक्त रुपमा आयोजना गरेको कार्यक्रममा सम्मान गरिएको हो । 

अधिकारी युवा सशक्तिकरण ,नेतृत्व विकास ,परिचालन र उत्प्रेरणा मार्फत युवामैत्री स्थानीय शासन र सामाजिक रुपान्तरणमा ६ वर्षदेखि सक्रिय हुँदै आउनुभएको छ ।  अधिकारीले २०७४ साल देखि ‘ड्रिम बिग प्रोजेक्ट’ नामक रुचि ,जुनून र सफलता सँग सम्बन्धित अभियान  संचालन गर्दै आउनुभएको छ । उहाँ भन्नुहुन्छ– ‘युवाले उसको रुचि र खुवी भएको क्षेत्रमा मन लगाएर काम गरिदियो भने भविष्यमा देशलाई प्रत्यक्ष वा अप्रत्यक्ष रुपमा पक्कै फाइदा हुनेछ ।’

अभियानकै क्रममा विभिन्न कार्यक्रम ,सभा ,भेला ,गोष्ठी ,सेमिनार ,विद्यायालय , क्याम्पस ,विश्वविद्यालय इत्यादि स्थानमा अधिकारी हालसम्म कर्णाली प्रदेशका करिव आठ हजार युवासम्म आफू पुगेको बताउनुहुन्छ । 

अधिकारी राष्ट्रिय युवा परिषद्का प्रशिक्षक समेत हुनुहुन्छ । नमूना संसद अभ्यास कार्यक्रम  (स्थानीय तह) प्रशिक्षणकै क्रममा उहाँ हालसम्म कर्णाली प्रदेशका १३ वटा पालिकामा पुगिसक्नु भएको छ ।  ७७ वटा वडा स्तरीय युवा क्लब गठन र १३ पालिका स्तरीय युवा क्लब संजाल गठनमा सहजीकरण ,सहकार्य र समन्वय गरेको उहाँ बताउनुहुन्छ ।

अधिकारी कर्णाली प्रदेशका ७९ वटा स्थानीय तह मध्ये हालसालै गठन भएको प्रदेशकै पहिलो स्थानीय युवा परिषद् ,दैलेख जिल्लाको भगवतीमाई गाउँपालिका ,गाउँ युवा परिषद्का कार्यकारी उपाध्यक्ष र प्रदेश युवा क्लब सञ्जाल ,कर्णाली प्रदेशका निवर्तमान इन्चार्ज समेत हुनुहुन्छ । 

कार्यक्रममा राजेन्द्र अधिकारीसँगै विभिन्न क्षेत्रमा योगदान पुर्याउनु भएका टीकाराम चपाई , नन्दा बस्याल, ज्योति कटुवाल,  अनिल बानियाँ, उपेन्द्रप्रसाद न्यौपाने, शर्मिला बिसी र राजेन्द्र विष्टलाई पनि  सम्मान गरिएको छ ।