कालीकोट । नरहरिनाथ गाउँपालिकाको वडा नम्बर ९ स्थित लालुगाउँ विद्युत्को राष्ट्रिय प्रसारण लाइनले जोडिएको छ। गाउँमा थ्रीफेज वितरण ट्रान्सफर्मर जडान तथा सञ्चालन भएको हो।

पहिलोपटक गाउँमा विद्युत्को ११ केभी राष्ट्रिय प्रसारण लाइन जडान भएपछि वडाका दुई सय घरधुरीमा विद्युत् पुगेको वडाध्यक्ष प्रदीप बोहोराले जानकारी दिनुभएको छ। ‘विद्युतीकरणको सुविधा पाएपछि यहाँका नागरिकको जीनस्तरमा थप सुधार हुने अपेक्षा गरिएको छ’ उहाँले भन्नुभयो– ‘राष्ट्रिय प्रसारण लाइनको सेवा विस्तार नहुँदा यसअघि सौर्य बत्तीमार्फत नागरिकलाई सेवा प्रवाह हुँदै आएको थियो ।’

विद्युत् सेवा जडान भएसँगै स्थानीयको दैनिकी सहज हुने वडाध्यक्ष बोहोराले बताउनुभयो। ‘अहिले यहाँका करिब १ हजार घरधुरीमा एक महिनाभित्र बत्ती बाल्ने योजना छ’ उहाँले भन्नुभयो– ‘पहिलो चरणमा २ सय घरधुरीमा विद्युत् जडान गरिएको छ।’

कालीकोटका ९ स्थानीय तहमध्ये ८ वटामा बिजुली पुगेको र पलाँता गाउँपालिकामा मात्र बिजुली पुग्न बाँकी रहेको नेपाल विद्युत् प्राधिकरण कालीकोट वितरण केन्द्र प्रमुख विमलप्रसाद साहले बताउनुभयो। ‘विद्युत् पुगेका पालिकाको वडा, प्रत्येक टोलमा प्रसारण लाइन जडानको काम चलिरहेको छ’ उहाँले भन्नुभयो– ‘चालु आर्थिक वर्षमा जिल्लाभर विद्युत् विस्तार गर्ने लक्ष्य राखिएको छ।’

जिल्लामा कूल २६ हजार ७ सय ७९ घरधुरीमध्ये हालसम्म ५ हजार ५ सय घरमा विद्युत्को मिटर जडान गरिएको नेपाल विद्युत् प्राधिकरण कालीकोट वितरण केन्द्रले जनाएको छ।