काठमाडौँ । गएको सातादेखि नै ओरालो यात्रामा रहेको  नेपाल स्टक एक्सचेञ्ज (नेप्से) परिसूचक आज पनि घटेको छ । 

नेप्से परिसूचक मंगलबार ३२ दशमलव २१ अंकले घटेको हो । पुँजीबजार कारोबार पछिल्लो सात दिनमा लगातार घट्दो क्रममा देखिएको हो । आज नेप्से परिसूचकमा १ दशमलव १७ प्रतिशत कमी पछि २ हजार ७ सय १९ दशमलव २० को बिन्दुमा अडिएको छ । 

आज ३ सय ३ कम्पनीको १ करोड ५५ लाख ५९ हजार ६ सय ८३ कित्ता शेयर, ९२ हजार ३१ पटक खरिदबिक्री हुँदा ८ अर्ब ३९ करोड ११ लाख ४९ हजार रुपैयाँ बराबरको कारोबार भएको छ ।

आज विकास बैङ्क समूह एक दशमलव ९३ प्रतिशतले बढेको छ भने अरु सबै समूहको उपसूचक घटेको छ । बैंकिङ शून्य दशमलव ७१, वित्त एक दशमलव ५७, होटल तथा पर्यटन एक दशमलव १३, जलविद्युत् एक दशमलव ५१, लगानी एक दशमलव ८९ र जीवन बीमा समूह एक दशमलव ३० प्रतिशतले घटेको छ । त्यसैगरी, उत्पादन तथा प्रशोधन समूह दुई दशमलव ४९, लघुवित्त शून्य दशमलव ८९, म्युचुअल फन्ड शून्य दशमलव १०, निर्जीवन बीमा शून्य दशमलव ९९, व्यापार समूह एक दशमलव ७९ र अन्य समूह एक दशमलव ६८ प्रतिशतले घटेको छ ।

रकमका आधारमा आज सबैभन्दा धेरै हिमालयन रिइन्स्योरेन्स लिमिटेडको  ५८ करोड ६५ लाख १७ हजार रुपैयाँ बराबरको कारोबार भएको छ ।  सङ्ख्याका आधारमा सबैभन्दा धेरै महालक्ष्मी विकास बैङ्क लिमिटेडको ९ लाख ९१ हजार ४ सय ४४ कित्ता शेयर किनबेच भएको छ ।