दाङ ।  तुलसीपुरस्थित ‘हाम्रो पहुँच’ बहुउद्देश्यीय सहकारी संस्थाले १ सय जना भन्दा बढीलाई रोजगारी प्रदान गरेको छ । 

चार हजार ७ सय शेयर सदस्य रहेको सहकारीले १ सय ७ जनालाई प्रत्यक्ष रोजगारी प्रदान गरेको हो । संस्थाका अध्यक्ष शुक्रराज भण्डारीले १ सय १ जनाले रोजगारी पाउनुका साथै १ हजार २ सय उद्यमशीलतामा जोडिएका जानकारी दिनुभयो । उहाँका अनुसार सहकारीले बचत तथा ऋणसहित विद्यालय, पेट्रोलपम्प, डेरी उद्योगसहित विभिन्न  ६ वटा व्यवसाय सञ्चालन गर्दै आएको छ । 

विसं २०६४ मा स्थापनि भएको उक्त सहकारीले तुलसीपुर उपमहानगरपालिकाका सबै वडाहरूमा सेवा प्रदान गरिरहेको छ । हाल सहकारीको वार्षिक कारोबार ६० करोड रुपैयाँ रहेको अध्यक्ष भण्डारीले जानकारी दिनुभयो । उहाँका अनुसार आर्थिक वर्ष २०८० र ८१ मा मात्रै  एक करोड २८ लाख २ हजार ८  सय ६५ रुपैयाँ बचत छ ।  

पछिल्लो समय सहकारी सम्बन्धमा नकारात्मक विषय बढी आउने गरेका भन्दै अध्यक्ष भण्डारीले सकारात्मक र उदाहरणीय काम गरिरहेका सहकारीलाई स्थानीय सरकारले संरक्षण र प्रवर्द्धन गर्न योजनाबद्ध काम गर्नुपर्नेमा जोड दिनुभएको छ । 

चालु आर्थिक वर्षमा आठ सय नयाँ सदस्य थप्ने लक्ष्य रहेको उल्लेख गर्दै हाल तुलसीपुर उपमहानगरमा मात्रै कार्य क्षेत्र रहेकामा आगामी दिनमा जिल्लाभर विस्तार गर्ने योजना रहेको उहाँले बताउनुभयो ।