काठमाडौँ । सरकारले सिंहदरवार आसपासको क्षेत्रमा पैदल हिड्न समेत रोक लगाएको छ । राष्ट्रिय प्रजातन्त्र पार्टी (राप्रपा)को प्रदर्शनलाई लक्षित गरी सिंहदरबार वरपर सुरक्षा व्यवस्था कडा पारिएको प्रहरीले बताएको छ । 

देशकै प्रमुख प्रशासनिक केन्द्र सिंहदरबार क्षेत्र आउने सबैक्षेत्रका सडकमा सवारी साधन सञ्चालनमा रोक लगाइएको छ भने पैदल यात्रुलाई पनि कडाइ गरिएको छ । सिंहदरबार दक्षिण गेट, हनुमानथान, अनामनगर, वैद्यखाना, न्यूप्लाजा, सिंहदरबार पश्चिम गेट र स्वास्थ्य मन्त्रालयतर्फका सबै सडक सुनसान छन् ।

प्रहरीले दर्जनौँ स्थानमा ब्यारिकेड खडा गरेर बाटो बन्द गरेपछि एम्बुलेन्स र प्रेस लगायत अत्यावश्यक सवारी साधनको आवागमनमा समेत अवरोध भएको छ । प्रहरीको अवरोधका कारण ती सडकहरु सुनसान छन् । सयौँको संख्यामा सुरक्षाकर्मीहरु तैनाथ छन् । सिंहदरबारको पर्खाल वरिपरि दंगा नियन्त्रण बललाई खटाइएको छ ।