हेटौंडा । बागमती सरकारले चितवनस्थित गौतम बुद्ध अन्तर्राष्ट्रिय रंगशाला निर्माणका लागि  करिब ५३ करोड रुपैयाँ विनियोजन गरी ठेक्का आह्वान गर्न स्वीकृत प्रदान गरेको छ ।

मंगलबार बिहान बसेको प्रदेश मन्त्रिपरिषद् बैठकले रंगशाला निर्माणका लागि ५२ करोड ५० लाख रुपैया सुनिश्चित गर्दै बहुवर्षीय ठेक्का आह्वान गर्न स्वीकृति प्रदान गर्ने निर्णय गरेको मुख्यमन्त्री शालिकराम जम्कट्टेलले जानकारी दिनुभयो । 

यसअघि सोमबार बागमती प्रदेशका आर्थिक मामिलामन्त्री बहादुरसिंह लामा र स्वास्थ्यमन्त्री उत्तम जोशीले रङ्गशाला निरीक्षण गर्दै निर्माणका लागि प्रदेश सरकारले बजेट सुनिश्चित गर्ने प्रतिवद्धता दिनुभएको थियो । 

रङ्गशाला निर्माणस्थल अवलोकनपछि अर्थमन्त्री लामाले बजेट विनियोजन गर्ने  प्रतिबद्धता जनाउनुभएको थियो । प्रदेश सरकारले ७० प्रतिशत बजेट विनियोजन गर्ने उहाँले बताउनुभयो । भरतपुर महानगरपालिकाकी प्रमुख रेणु दाहाललाई पनि उहाँले रङ्गशालामा बजेट पार्ने विश्वास दिलाउनुभयो । देशकै गौरवको आयोजना प्रदेशमा भएकाले यसलाई पूरा गर्नु प्रदेश सरकारको दायित्व रहेको बताउँदै मन्त्री लामाले भन्नुभयो, “रङ्गशाला निर्माणमा प्रदेश सरकारको चासो छ । हामी बजेट सुनिश्चित गरेरै अघि बढ्छौँ । ढुक्क हुनुस् ।”