काठमाडौँ । रानीपोखरीस्थित शान्ति वाटिकामा धर्नामा बसेकाहरुलाई  काठमाडौं महानगरीय प्रहरीले लखेटेको छ । 

शान्ति वाटिकामा मिटरब्याज पीडित, आरती साहको परिवार लगायत धर्नामा बस्दै आएका थिए । महानगरीय प्रहरीले धर्नामा बसेकाहरुलाई मंगलबार बिहान लछारपछार गर्दै उनीहरुले पकाएको भात समेत फालिदिएर त्यहाँबाट लखेटेको हो । 

मिटर ब्याज तथा ठगीविरुद्ध किसान मजदूर संघर्ष समितिको केन्द्रीय सदस्य आकाश क्षेत्रीले महानगरीय प्रहरील आफूहरुलाई  पाकेको भात समेत खान नदिएर दुर्व्यवहार गर्दै लखेटेको  दुखेसो सुनाउनुभएको छ । 

‘हामी करिब २५ जना बसिरहेका थियौँ’ उहाँले भन्नुभयो– आज बिहान करिब साढे ८ बजेतिर महानगरीय प्रहरी प्रमुख राजुनाथ पाण्डेसहित नगर प्रहरीहरु आएर हाम्रो सामान फालिदियो । पकाएको भात पनि खान दिएन । दुर्व्यवहार पनि गर्‍यो ।’

मिटरब्याज पीडित, आरती साहको परिवार  यसअघि माइतीघरमा धर्ना बसेका थिए । प्रशासनले  माइतीघरलाई प्रदर्शन निषेधित क्षेत्र घोषणा गरेपछि प्रहरीले हटाएको हो । उनीहरुले त्यसपछि शान्ति वाटिकालाई धर्नास्थल बनाएका हुन् । 

काठमाडौँ महानगरपालिकाका नगर प्रहरी प्रमुख राजुनाथ पाण्डेले  धर्नाकारीहरु शान्ति बाटिकामा महिनौदेखि बसेर फोहर गर्न थालेपछि  हटाउनु परेको बताउनुभएको छ ।