सर्लाही । सर्लाहीमा ट्रकको ठक्करबाट साइकल यात्री किशोरीको मृत्यु भएको छ । हरिपुर्वा नगरपालिका-९ मिर्चैया बजारमा ना ५ ख ३८५८ नम्बरको ट्रकले साइकललाई ठक्कर दिँदा साइकलयात्री ईश्वरपुर नगरपालिका-१३ श्रीनगरका १७ वर्षीया अञ्जली महतोको मृत्यु भएको हो । 

अञ्जलीको घटनास्थलमा मृत्यु भएको जिल्ला प्रहरी प्रवक्ता एवं प्रहरी नायव उपरीक्षक सरोज राईले जानकारी दिनुभएको छ । उहाँका अनुसार साइकलको पछाडि सवार १५ वर्षीया पूजाकुमारी महतो घाइते भएकी छन् । 

घाइते किशोरीको स्थानीय स्वास्थ्य संस्थामा उपचार भइरहेको र मृतकको शव परीक्षणका लागि प्रादेशिक अस्पताल मलङ्गवामा राखिएको प्नाउ राईले बताउनुभयो । 

प्रहरीले घटनामा संलग्न ट्रक र चालक हरिवन नगरपालिका-१० ताइवानका ३१ वर्षीय लक्ष्मण विश्वकर्मालाई नियन्त्रणमा लिएर थप अनुसन्धान गरिरहेको उहाँले जानकारी दिनुभयो ।