सुनसरी । सुनसरीका ३ स्थानीय तहले सडकबत्तीको ५ करोड ९१ लाख ६० हजार रुपैयाँँ बक्यौता तिर्न बाँकी रहेको छ । 

इटहरी उपमहानगरपालिका, रामधुनी नगरपालिका र बराक्षेत्र नगरपालिकाले सडकबत्तीको बक्यौता तिर्न बाँकी रहेको नेपाल विद्युत् प्राधिकरण इटहरी वितरण केन्द्रका प्रमुख रामउदगार साहले जानकारी दिनुभयो । बक्यौता तिर्न पटक–पटक सूचना जारी गरे पनि हालसम्म नतिरेको उहाँले बताउनुभयो । इटहरी उपमहानगरपालिकाले ३ करोड ७७ लाख ४० हजार, बराहक्षेत्र नगरपालिकाले १ करोड ३५ लाख २५ हजार र रामधुनी नगरपालिकाले  ७८ लाख ९४ हजार रुपैयाँ बक्यौता तिर्न बाँकी रहेको छ ।

प्रमुख साहले भन्नुभयो– ‘बक्यौता रकम तिर्न पालिकालाई पत्र पठाउँदै आएका छौँ ।’

इटहरी वितरण केन्द्रका सूचना अधिकारी सुरज गोसाईंका अनुसार प्रत्येक महिना सडकबत्तीको बिल पालिकालाई पठाउने गरिएको छ । 

प्राधिकरणले बक्यौता नतिर्नेको विद्युत्को लाइन काट्दै आएको छ । चालू आर्थिक वर्ष २०८१ र ८२ मा साउन महिनायता १२ हजार ८२ जनाको लाइन काटिएको उहाँले बताउनुभयो ।