बुटवल । लुम्बिनी प्रदेशसभामा संसदीय समिति निर्वाचन स्थगित भएको छ ।  प्रदेशसभाको विभिन्न विषयगत समितिको आउने मंगलबार गर्ने भनिएको निर्वाचन सभापतिको आकांक्षीबीच सहमति नजुट्दा स्थगित गरिएको हो । 

प्रदेशसभाले आइतबार सूचना जारी गर्दै निर्वाचन स्थगित भएको जानकारी गराएको छ ।  सभामुख तुलाराम घर्तीको अध्यक्षतामा अघिल्लो सोमबार बसेको कार्यव्यवस्था परामर्श समितिको ८ औं बैठकले मंगलबार निर्वाचन गर्ने निर्णय गरेकोथियो । त्यसको लागि पुस १६ गते विषयगत समितिको सभापतिको उम्मेदवारी दर्ता र १७ गते निर्वाचनको मिति तोकिएको  थियो । प्रदेशसभाले जारी गरेको सूचनामा सभामुखको निर्देशन अनुसार निर्वाचन स्थगित गरिएको जनाइएको छ । 

प्रदेशसभामा रहेका विभिन्न दलभित्र समितिको नेतृत्वमा धेरै आकांक्षी देखिएका छन् । आकांक्षीहरुको अडानले दललाई भागबण्डा मिलाउन सकस भएकोले तत्कालको लागि निर्वाचन नै स्थगित गर्नुपरेको स्रोतले बताएको छ । 

प्रदेशसभाले गएको असार ३० गते ६ विषयगत समितिका सदस्य चयन गरेको थियो । तर सभापति चयन हुन सकिरहेको छैन । सभापति नहुँदा समिति कामविहीन भएका छन् । अहिलेसम्म ६ विषयगत समिति मध्ये ३ समितिको मात्र बैठक बसेको छ ।