काठमाडौँ । राष्ट्रपति रामचन्द्र पौडेललाई स्वास्थ्य उपचारको लागि राज्यकोषबाट फेरि १० लाख दिइने भएको छ । 

राष्ट्रपति पौडेलको उपचार खर्चको लागि सरकारले ९ लाख ९५ हजार ९ सय ३५ रुपैयाँ दिने तयारी गरेको छ ।  उल्लेखित रकम अर्थ मन्त्रालयले प्रधानमन्त्री तथा मन्त्रिपरिषद्को कार्यालयलाई निकासा गरेको छ । 

सरकारले राष्ट्रपति पौडेलको उपचारको लागि यसअघि ५५ लाख दिएको थियो । राष्ट्रपति पौडेलको गएको वैशाखमा भारतको नयाँ दिल्लीस्थित अल इण्डिया इन्स्टिच्युट अफ मेडिकल साइन्सेस (एम्स)मा उपचार गरिएको थियो ।  राष्ट्रपति पौडेल वैशाख ६ देखि १७ गतेसम्म एम्समा रहँदा उपचार गर्न जाँदा र आउँदा लागेको हवाई भाडा, अस्पतालको खर्च र सुरक्षाकर्मीहरुको दैनिक भ्रमणभत्ता लगायतमा ५५ लाख २ हजार २ सय ७९ रुपैयाँ खर्च भएको थियो । त्यो रकम राज्यकोषबाट व्यहार्ने निर्णय गरी असार १२ गते मन्त्रिपरिषले भुक्तानीको निर्णय गरेको थियो ।