काठमाडौँ ९ पुस : धनगढी एफसी नेपाल सुपर लिग (एनएसएल) फुटबलको फाइनलमा प्रवेश गरेको छ । धनगढी एफसीले पोखरा थन्डर्सलाई ‘टाइब्रेकर’मा पराजित गर्दै फाइनलमा स्थान बनाएको हो ।  

त्रिपुरेश्वरस्थित दशरथ रङ्गशालामा आज भएको खेलमा धनगढीले पोखरालाई टाइब्रेकरमा ४–३ गोलअन्तरले पराजित गरेको हो । नब्बे मिनेटको निर्धारित समयमा दुवै टोलीले १–१ गोलको बराबरी खेले । त्यसपछिको ३० मिनेटको अतिरिक्त समयमा दुवै टोलीले थप १–१ गोल गर्दै बराबरी खेलेपछि खेल टाइब्रेकरमा धकेलिएको हो । 

यसअघि खेलको पाँचौँ मिनेटमा पोखराले पहिलो गोल गर्दै अग्रता लिएको थियो । उक्त गोल आयुष घलानले गरेका थिए । त्यस्तै खेलको ५४औँ मिनेटमा धनगढीका लागि कप्तान देवेन्द्र तामाङले गोल गरे । यस्तै अतिरिक्त समयमा पोखराका लागि स्टेफन कोजो एनोरले तथा धनगढीका लागि अहमद हिजाजीले गोल गरेका थिए ।