रामेछाप । सुनकोशी गाउँपालिकामा बसले मोटरसाइकललाई ठक्कर दिँदा २ जनाको मृत्यु भएको छ । 

मन्थलीबाट काठमाडौँ जाँदै गरेको बागमती प्रदेश ०१–००६ ख ४५९३ नम्बरको पूर्वअरनिको यातायात सेवा समितिको बसले काठमाडौँबाट खुर्कोटतर्फ जाँदै गरेको बा ६० प ३५४५ नम्बरको मोटरसाइकललाई सोमबार बिहान गाउँपालिका बोहोरेटार–३ मा ठक्कर दिएको हो । 

ठक्कर दिँदा   काठमाडौँतर्फ जाँदै गरेको अरनिको बसले विपरीत दिशाबाट आइरहेको मोटरसाइकललाई ठक्कर दिँदा मोटरसाइकलमा सवार एक जनाको घटनास्थलमै र एक जनाको उपचारका लागि लैजाने क्रममा बाटोमै मृत्यु भएको छ । 

मोटरसाइकलमा पछाडि सवार खोटाङ दिक्तेल नगरपालिका–१० रुपाकोटकी १८ वर्षीया मुनाकला राई र मोटरसाइकल चालक खोटाङ तुवाचुङ नगरपालिका –२ का कुमार राईको मृत्यु भएको प्रहरीले जनाएको छ ।  मुनाकलाको घटनास्थलमै र  कुमारको  उपचारका लागि स्थानीय खाल्टे अस्पतालमा लैजाँदै गर्दा बाटोमै मृत्यु भएको सुनकोशी गाउँपालिका–३ का वडाध्यक्ष चन्द्र श्रेष्ठले जानकारी दिनुभएको छ । 

बस चालक मन्थली १३ फुलासीका २४ वर्षीय रुपेश अधिकारीलाई प्रहरीले नियन्त्रणमा लिई आवश्यक अनुसन्धान गरिरहेको छ ।