काठमाडौँ । संक्रमणकालीन न्यायलाई टुङ्गो लगाउनेबारे प्रधानमन्त्री र प्रमुख दलका शीर्ष नेताहरुबीच छलफल भएको छ । प्रधानमन्त्री पुष्पकमल दाहालले  संक्रमणकालीन न्यायबारे आइतबार नेपाली  कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओलीसँग छलफल गर्नुभएको हो  । 

छलफलमा  कांग्रेसका प्रमुख सचेतक रमेश लेखक समेत  सहभागी हुनुभएको प्रधानमन्त्रीका प्रेसविज्ञ मनोहरि तिमिल्सिनाले जानकारी दिनुभएको छ ।  तिमिल्सिनाका अनुसार उहाँहरुबीच संक्रमणकालीन न्यायसँग जोडिएको शान्ति प्रक्रियाका बाँकी कामलाई पूर्णता दिने लगायत विषयमा छलफल भएको छ  । सोमबार पुनः बैठक बस्ने सहमति भएको छ । 

बेपत्ता पारिएका व्यक्तिको छानबिन र सत्य निरुपण तथा मेलमिलाप आयोग ऐन, २०७१ लाई संशोधन गर्न बनेको विधेयक संघीय संसदमा विचाराधीन अवस्थामा छ । उच्च राजनीतिक तहमा सहमति जुटाएर  विधेयक संसद्को आगामी बैठकमा पारित गर्ने तयारी गरिएको छ । सरकारले संघीय संसद्को हिउँदे अधिवेशन बोलाउने तयारी गरिरहेको छ ।