काठमाडौँ । विशेष अदालतबाट भएको फैसला चित्त बुझ्दो नभएपछि अख्तियार दुरुपयोग अनुसन्धान आयोग  पुनरावेदनका लागि आइतबार सर्वोच्च अदालत पुगेको छ ।

आयोगले चितवन राष्ट्रिय निकुञ्ज कार्यालय सौराहा सेक्टरका तत्कालीन सहायक संरक्षण अधिकृत अभिनय पाठक विरुद्धको मुद्दामा पुनरावेदन गरेको हो । आयोगले ३१ लाख ५९ हजार ७ सय ३५ रुपैयाँ बराबरको बिगो दाबी गरेको थियो । त्यो मुद्दामा विशेषले गत असार १८ गते सफाइ दिएको थियो ।

त्यसैगरी आयोगले नापी कार्यालय रुपन्देहीका नापी अधिकृत ध्रुवराज मरासिनी, विन्देश्वर याव र सर्वेक्षक ठाकुरप्रसाद गुरौ विरुद्धको मुद्दामा पनि पुनरावेदन गरेको छ । 

जग्गा नियम विपरीत कित्ता काट र गलत फाइल नक्सा तयार पारेकाले त्यो कार्य भ्रष्टाचारजन्य गतिविधि रहेको आयोगको ठहर छ । त्यो मुद्दामा विशेष अदालतले २०८० फागुन १७ गते फैसला गरेको हो ।