काठमाडौँ । प्रधानमन्त्री तथा नेकपा एमालेका अध्यक्ष केपी शर्मा ओली पहिलो पटक नेकपा एकीकृत समाजवादीको कार्यालयमा पुग्नुभएको छ । प्रधानमन्त्री ओली दिवंगत एकीकृत समाजवादीका सल्लाहकार तथा वरिष्ठ पत्रकार लेखक कमल कोइरालालाई श्रद्धाञ्जली दिन सोमबार दिउँसो आलोकनगर पुग्नुभएको हो । 

प्रधानमन्त्री ओलीलाई एकीकृत समाजवादीका अध्यक्ष माधवकुमार नेपाल, सम्मानित नेता झलनाथ खनाल र महासचिव घनश्याम भुसाल लगायतका नेताहरूले स्वागत गर्नुभएको छ । प्रधानमन्त्री ओलीसँगै पूर्वमन्त्री भिमरावल र नेकपा माओवादीका वरिष्ठ उपाध्यक्ष नारायणकाजी श्रेष्ठ समेत एकीकृत समाजवादीको मुख्यालय पुग्नुभएको छ । 

पहिलो पटक एकीकृत समाजवादीको कार्यालय पुग्नुभएका ओलीले प्रधानमन्त्री अध्यक्ष नेपालसहितका नेताहरुसँग केही बेर भलाकुसारी समेत गर्नुभयो । राजावादीहरुले शुक्रबार प्रदर्शनको क्रममा एकीकृत समाजवादीको कार्यालय तोडफोड र आगजनी गरेका थिए ।  ओलीले प्रधानमन्त्रीले त्यसबारे समेत जानकारी दिनुभएको एकीकृत समाजवादीको कार्यालय सचिव रामकुमार भट्टराईले बताउनुभएको छ।

यसअघि एकीकृत समाजवादीको नाम लिन र सुन्न समेत नचाहने ओली कार्यालय पुग्नुले दुई दलबीच सम्बन्ध सुधारको संकेत देखिएको छ ।