काठमाडौँ ।  नेपाल विद्युत् प्राधिकरणका प्रबन्ध निर्देशक कुलमान घिसिङलाई पदबाट हटाएको विरोधमा भएको प्रदर्शनमा एक जना विदेशी नागरिक पक्राउ परेका छन् ।

माइतीघरमण्डलमा बिहीबार गरिएको प्रदर्शनमा जुली नामका अमेरिकी नागरिक पक्राउ परेका हुन् । प्रदर्शनको शुरूमा कुलमान घिसिङको समर्थनमा पम्प्लेटसहित माइतीघरमा देखिएका उनी त्यसलगत्तै राजावादीको पोस्टर बोकेर प्रहरीसँग भिड्न जाइलागेका थिए। त्यसपछि प्रहरीले उनलाई पक्राउ गरेको हो । 

अलिअलि नेपाली, हिन्दी र राम्रोसँग अंग्रेजी बोल्न जान्ने  उनलाई अहिले प्रहरी वृत्त, सिंहदरबारमा राखिएको छ । उनले शुरूमा आफू कुनै पनि देशको नभएको बताएका थिए । तर प्रहरीले सोधपुछ गर्दा आफू अमेरिकी नागरिक भएको बताएका छन् ।  उनको साथमा राहदानी भने छैन । राहदानी पछि उपलब्ध गराउने बताएका छन् । उनले आफ्नो नाम जुली र उमेर ५८ वर्ष भएको बताएका छन् । 

सरकार विरोधी गतिविधिमा लागेका उनी डिपोर्टमा पर्न सक्ने सम्भावना देखिएको छ ।