बाजुरा ।  बाजुरा ट्र्याक्टर दुर्घटना हुँदा एक जना मृत्यु भएको छ । खप्तड छेडेदह गाउँपालिकामा आइतबार राति भे २ त १५८८ नम्बरको ट्र्याक्टर दुर्घटना भएको हो । 

बूढीगङ्गा नगरपालिका–४ खोडालबाडामा भएको दुर्घटनामा  ३३ वर्षीय ट्र्याक्टर चालक पदमबहादुर रावतको जीवन गुमेको जिल्ला प्रहरीले जनाएको छ । प्रहरीका अनुसार  खप्तड छेडेदह गाउँपालिकाबाट बूढीगङ्गा नगरपालिका आउँदै गरेको ट्र्याक्टर ओरालोमा अनियन्त्रित सडकबाट करिब २ सय ५० मिटर तल खसेको  हो । ट्र्याक्टरको  पछाडिको भाग अर्थात् ट्रली भने फुत्किएर करिब ५० मिटरमा अड्किएको छ । 

ट्र्याक्टरमा सवार रहेका चार जना मध्ये चालक रावतका छोरा सञ्जय रावतलाई सामान्य चोट लागेको छ । घाइते बालकको स्थानीय स्वास्थ्यचौकीमा उपचार भइरहेको निमित्त प्रहरी नायव उपरीक्षक जनक बोहराले बताउनुभएको छ । अन्य तीन जना सकुशल रहेका छन् ।