मोरङ। नेकपा एमाले मोरङको दसौँ अधिवेशनमा नयाँ नेतृत्व चयनका लागि भएको मतदानमा अध्यक्ष केपी शर्मा ओली पक्षलाई  पराजित गर्दै पूर्वराष्ट्रपति विद्यादेवी भण्डारी पक्षधर प्यानल नै निर्वाचित भएको छ । 

जिल्ला नेतृत्वका लागि पूर्वराष्ट्रपति भण्डारी र पार्टी अध्यक्ष केपी शर्मा ओली पक्षधर नेताहरू प्यानल बनाएरै मैदानमा उत्रिएका थिए । भण्डारी प्यानलबाट अध्यक्षका लागि अजम्बर राई र ओली समूहबाट राजकुमार ओझा अध्यक्षका उम्मेदवार हुनुहुन्थ्यो । 

अध्यक्षमा राईसहित भण्डारी पक्षका नेताहरूको प्यानल नै निर्वाचित भएको हो । राईले ४ सय ४६ मत प्राप्त गर्दा प्रतिस्पर्धी ओझाले ४ सय ७ मत प्राप्त गर्नुभएको थियो । 

उपाध्यक्षमा सागर थापा ४ सय २२ मत प्राप्त गर्दा उहाँका प्रतिस्पर्धी शान्ति लिम्बू भूजेलले ३ सय ९१ मत प्राप्त गर्नुभयो । थापा भण्डारी पक्षको प्यानलमा हुनुहुन्थ्यो भने भूजेल ओली प्यानमा । 

सचिवमा ४ सय ६२ मत प्राप्तसहित सोमराज थापा निर्वाचित हुनुभएको छ भने उहाँका प्रतिस्पर्धी रविन थापाले ३ सय ६८ मत प्राप्त गर्नुभयो । उपसचिवमा सन्तोष वान्तवा र उषा झा निर्वाचित हुनुभएको छ । वान्तवाले ४ सय ९० र झाले ४ सय १८ मत प्राप्त गर्नुभयो । 

मतपरिणामको औपचारिक घोषणा हुन बाँकी छ ।