काठमाडौँ । त्रिभुवन विश्वविद्यालयको विज्ञान तथा प्रविधि अध्ययन संस्थानको डिन कार्यालय र रेक्टर कार्यालय तोडफोड भएको छ । रेक्टर र डिन कार्यालय शुक्रबार तोडफोड भएको हो । 

‘कार्यकक्षमा तोडफोड भएको छ, कुर्सी उल्टोपाल्टो भएको छ’  डिन प्रा डा शंकर खनालले भन्नुभयो– ‘कागजात छरप्रपट पारिएको छ । सिसा फुटाइएको छ ।’

विद्यार्थीहरुले डिन खनाल  कार्यकक्षमा नभएको बेला  त्यहाँ तोडफोड गरेका हुन् ।   ‘म कार्यालय जाँदै थिए । बाटोमा हुदा कर्मचारीले फोन गरेर तोडफोड भएको जानकारी गराउनु भयो’ उहाँले भन्नुभयो – कार्यालय पुग्दा तोडफोड भइसकेको थियो । कसले फोरेको हो ? त्यो एकीन भएको छैन ।’

डिन खनालका अनुसार फिजिक्सका विद्यार्थीले हिजो कार्यकक्षमा आएर परीक्षा सार्न भनेका थिए । खनालले तिनै  विद्यार्थीले तोडफोड गरेका हुन् वा अरु कसैले, त्यो समेत थाहा नभएको उल्लेख गर्नुभयो 

‘उनीहरूले गरेको हो होइन त्यो थाहा छैन । तर हिजो विद्यार्थी आउनु भएको थियो । परीक्षा सर्नुपर्‍यो भन्नु भएको हो’ उहाँले भन्नुभयो– मैले उहाँहरुलाई  क्यालेन्डर बिग्रन्छ । स्ववियु चुनावको दिन परीक्षा छैन भनेपछि सहमत भएर जानु भएको हो ।’

डिन खनालले तोडफोडको अवस्था हेर्दा विद्यार्थीले गरेजस्तो नलाग्ने बताउनुभयो । ‘तोडफोड विद्यार्थीले गरेजस्तो लाग्दैन’ उहाँले भन्नुभयो – विश्वविद्यालयमा यस्तो घटना हुनु दुःखद हो ।’ 

यसअघि आजै त्रिविका शिक्षाध्यक्ष (रेक्टर)  प्रा. डा खड्क केसीको कार्यकक्षमा पनि त्यही समूहले तोडफोड गरेका छन् ।