काभ्रे । पाँचखाल नगरपालिकाले विभिन्न ४ विधेयक पारित गरेको छ ।  बिहीबार सम्पन्न १४औँ नगरसभाले नगरप्रमुख महेश खरेलद्वारा प्स्तुत दुई विधेयक संशोधन प्रस्ताव र दुई नयाँ विधेयक सर्वसम्मत रुपमा पारित गरेको हो । 

खरेलद्वारा प्रस्तुत दुई नयाँ नगर प्रहरी विधेयक, २०८० र वन विधेयक, २०८० सर्वसम्मतले पास गरिएको हो । खरेलद्वारा प्रस्तुत आर्थिक ऐन संशोधन र विनियोजन ऐनमा संशोधन प्रस्ताव पास भएको छ । उपप्रमुख सूर्यमाया दनुवारले चालु आर्थिक वर्षको पुससम्मको समग्र प्रगति र न्यायिक समितिको प्रगति प्रस्तुत गर्नुभएको थियो । नगरको चालु आव २०८०÷८१ का लागि विनियोजित कुल  ७९ करोड ९८ लाख रुपैयाँ मध्ये हालसम्म २९ दशमलव ३६ प्रतिशत खर्च भएको छ । चालुतर्फ  १५ करोड २४ लाख ४ हजार रुपैयाँ र पुँजीगततर्फ २६ दशमलव ९७ प्रतिशत खर्च भएको नगरपालिकाले जनाएको छ ।

नगरको चालु आवको हालसम्म विषयगत खर्च विवरणानुसार आर्थिक विकासतर्फ ३ करोड ११ लाख ७८ हजार रुपैयाँ विनियोजन भएकामा २५ दशमलव १२ प्रतिशत, सामाजिक विकासतर्फ  २९ करोड ५८ लाख ४ हजार रुपैयाँ विनियोजन भएकामा ३२ दशमलव ९९ प्रतिशत, पूर्वाधार विकासतर्फ विनियोजित  २५ करोड ४९ लाख ८३ हजार रुपैयाँ मध्ये २८ दशमलव ९८ प्रतिशत खर्च भएको छ । 

सुशासन तथा अन्तरसम्बन्धित क्षेत्रतर्फ २ करोड १० लाख ६१ हजार ५ सय रुपैयाँ विनियोजन भएकामा १० दशमलव ०७ प्रतिशत तथा कार्यालय सञ्चालन र प्रशासनिक विषयतर्फ विनियोजित  १९ करोड ६८ लाख १ हजार ५ सय रुपैयाँ मा २७ दशमलव १७ प्रतिशत खर्च भएको नगरपालिकाले जनाएको छ ।