चितवन। चितवनमा चरा गणना शुरु भएको छ । वर्ड एजुकेसन सोसाइटी चितवनले पूर्वी चितवनको राप्ती नदी, बूढीराप्ती, ढुम्रे, कसरालगायतका क्षेत्रबाट चरा गन्न थालिएको हो ।

सोसाइटीका जिल्ला अध्यक्ष टीकाराम गिरीका अनुसार चरा गणना देशभर शनिबारबाट थालिए पनि यहाँ आजबाट शुरु गरिएको हो । चितवन राष्ट्रिय निकुञ्ज र यस आसपासका नदी, तालतलैया तथा सिमसार क्षेत्रलगायत ठाउँमा चरा गणना गरिनेछ । पूर्वी चितवनमा ७ स्थानमा चरा गणना गरिनेछ । यसपछि पश्चिम चितवनमा शुरु गरिने उहाँले जानकारी दिनुभयो । 

उहाँले भन्नुभयो– आजदेखि आगामी माघ ७ गतेभित्र चरा गणना गरिसकिनेछ ।’ गणनाका लागि विभिन्न समूह निर्माण गरी कामलाई अघि बढाइएको उहाँले बताउनुभयो । पश्चिम चितवनको दिव्यनगर, कसरा पुलबाट पश्चिम  र रिउखोलामा पूर्वी चितवनको गणना सकिएलगत्तै गरिने छ । 

बाइनाकुलार क्यामेरा, जिपिएस, साउण्ड रेकर्डरलगायतको प्रयोग गरी चरा गणना गरिने उहाँले बताउनुभयो । जिल्लामा ६ सय ५० भन्दा बढी प्रजातिका चरा पाइन्छ ।  नेपालमा सन् १९८७ बाट चरा गणना थालिएको हो ।