भरतपुर। चितवनको माडीमा मोटरसाइकल दुर्घटना हुँदा वडा सदस्यको मृत्यु भएको छ ।  माडी नगरपालिका–१ स्थित गर्दिमा शनिबार साँझ  बाप्र०३०४प ८९१७ नम्बरको मोटरसाइकल दुर्घटना हुँदा वडा सदस्य ६० वर्षीय जीवलाल लुइँटेलको मृत्यु भएको हो । 

भरतपुरतर्फ आउँदै गरेको मोटरसाइकललाई नम्बर नखुलेको सवारीसाधनले ठक्कर दिँदा माडी–२ का वडा सदस्य लुइँटेलको मृत्यु भएको प्रहरीले जनाएको छ ।  लुइँटेल नेपाली कांग्रेसबाट वडा सदस्य निर्वाचित हुनुभएको थियो ।

मोटरसाइकलमा वनकट्टाबाट भरतपुरतर्फ आउँदै गर्दा वडा सदस्य लुइँटेल सवार मोटरसाइकललाई विपरीत दिशातर्फ गइरहेको ट्रयाक्टरले ठक्कर दिएको जिल्ला प्रहरी प्रवक्ता विजयराज पण्डितले जानकारी दिनुभएको छ । 

प्रहरी प्रवक्ता पण्डित अनुसार ठक्कर दिने ट्रयाक्टर भएको अनुमान गरिएको छ । अनुमानका आधारमा केही ट्रयाक्टरलाई नियन्त्रणमा लिएर अनुसन्धान गरिएको प्रहरीले जनाएको छ । माडीमा  केही दिनअघि पनि भ्यानले मोटरसाइकललाई ठक्कर दिँदा २ जनाको मृत्यु भएको थियो ।