काठमाडौँ ।  साताको पहिलो कारोबारदेखि नै निरन्तर ओरालो लाग्दै आएको शेयर कारोबार मापक नेप्से परिसूचक आज भने उच्च अंकले बढेको छ । 

साता कारोबारको अन्तिम दिन बिहीबार नेप्से ७८ दशमलव १७ अंकले  बढेको हो ।  नेप्से परिसूचक उकालो लागेर आज २ हजार ६ सय ८८ दशमलव ३८ मा अडिएको छ । 

ठूला कम्पनीको कारोबार मापन गर्ने सेन्सेटिभ परिसूचक १३ दशमलव ४० अङ्कले उकालो लागेर ४ सय ७८ दशमलव ४८ मा पुगेको छ । कारोबार भएका कूल १३ उपसमूहमध्ये आज १२ उपसमूहको शेयर मूल्यमा वृद्धि हुँदा एउटा उपसमूहको शेयर मूल्य भने घटेको छ । 

कूल १ करोड ९४ लाख ३३ हजार १ सय ५४ कित्ता शेयर,  ८ अर्ब १६ करोड ९२ लाख ७४ हजार ६  सय १२ रुपैयाँमा कारोबार भएको छ । विन नेपाल लघुवित्त, ग्रीन भेञ्चर्स लिमिटेड, इस्टन हाइड्रोपावर, रावा इनर्जीको शेयर मूल्यमा १० प्रतिशतले वृद्धि भई सकारात्मक सर्किट लागेको छ । त्यस्तै, एशियन हाइड्रोपावरका लगानीकर्ताले ९  दशमलव ९९ प्रतिशतले कमाएका छन् । 

थ्री स्टार हाइड्रोपावरको शेयर मूल्यमा १० प्रतिशतले कम भई नकारात्म्क सर्किट लागेको छ । सानिमा लार्ज क्याप फण्ड आठ दशमलव ४९, आरबिबी म्युचुअल फण्ड दोस्रो चार दशमलव शून्य एक, सनराइज फस्ट म्युचुअल फण्ड तीन दशमलव ७१ र सानिमा ग्रोथ फण्डका लगानीकर्ताले तीन दशमलव ६५ प्रतिशतले गुमाएका छन् ।