काठमाडौँ । सर्वोच्च अदालतको न्यायाधीशमा सिफारिस  गरिएकाहरुसँगको  संसदीय सुनुवाइ मंसिरको अन्तिम साता हुने भएको छ ।  संसदीय सुनुवाइ समितिले न्यायाधीशको लागि सिफारिस भएकाहरुसँग मंसिर २७, २८  र २९ गते हुने  सुनुवाइ गर्ने निर्णय गरेका छ  । 

न्यायपरिषदको  मंसिर ५ गतेको बैठकले सर्वोच्चको न्यायाधीशमा सारंगा सुवेदी, अब्दुल अजिज मुसलमान, महेश शर्मा पौड्याल, टेकप्रसाद ढुंगाना, सुनिल पोखरेल र बालकृष्ण ढकाललाई सिफारिस गरेको थियो । संसदीय  सुनुवाइ समितिले मंसिर ९ गते उहाँहरुप्रतिको उजुरी आह्वान गरेको थियो । समितिमा ९ वटा उजुरी परेको छ ।

समितिले उजुरीकर्तासँग मंसिर २४ गते छलफल गर्ने र त्यसको ३ दिनपछि न्यायाधीशमा सिफारिस व्यक्तिहरुको सुनुवाइ गर्ने तय गरेको बैठकमा सहभागी एक सांसदले जानकारी दिनुभयो ।  सर्वोच्चको न्यायाधीशको लागि सिफारिस भएकाहरुलाई संसदीय सुनुवाई समितिले अनुमोन गरेपछि मात्रै नियुक्तिको बाटो खुल्नेछ । संसदीय सुनुवाई समितिबाट अनुमोदन गरेपछि सर्वोच्चको न्यायाधीश नियुक्ति राष्ट्रपतिले गर्ने संवैधानिक प्रावधान छ ।