काठमाडौँ । विभिन्न दल निकट विद्यार्थी संगठनले एनसेलको शेयर खरिदबिक्रीमा आशंका गर्दै  विरोध जनाएका छन् । एनसेलको शेयर खरिदबिक्रीप्रति सत्ता गठबन्धन र प्रमुख प्रतिपक्षी दल निकट विद्यार्थीले विरोध गरेका हुन् ।

प्रमुख प्रतिपक्षी नेकपा एमाले निकट अनेरास्ववियुले  शेयर खरिदबिक्रीबारे छानविन हुनुपर्ने माग गर्दै मंगलवार एनसेल कार्यालय अगाडि प्रदर्शन गरेको छ । विद्यार्थीहरुले एनसेललाई राष्ट्रियकरण गर, विवादास्पद एनसेल शेयर बिक्रीको छानविन गर, लगायतका नारा लेखिएका प्लेकार्डसहित प्रदर्शन  गरे । 


एनसेलको ८० प्रतिशत शेयर बेलायतमा दर्ता भएको स्पेक्ट्रालाइट लिमिटेडले खरिद गरेको छ। त्यसमा कर छली भएका हुन सक्ने टिकाटिप्पणी हुँदै आएको छ ।

त्यस्तै सत्ता गठबन्धन निकट विद्यार्थी संगठनले पनि मंगलबार संयुक्त विज्ञप्ति निकालेर एनसेलको शेयर खरिदबिक्री प्रकरणप्रति विरोध जनाएका छन् ।