काठमाडौँ । गायिका एलिना चौहानलाई सामाजिक सञ्जालमा अशिष्ट कमेन्ट र गालीगलौज गरेको आरोपमा प्रहरीले एकजनालाई पक्राउ गरेको छ । 

नेपाल प्रहरीको साइबर ब्युरोले चितवन घर भई ललितपुरको बाडेगाउँ बस्ने ३३ वर्षीय गुन्जन राईलाई पक्राउ गरेको हो ।

राईलाई काठमाडौँ जिल्ला अदालत लगेर म्याद थप गर्ने तयारी भइरहेको ब्युरोका सूचना अधिकृत प्रहरी उपरीक्षक दीपकराज अवस्थीले जानकारी दिनुभयो ।  गायिका चौहानले यसअघि साइबर ब्युरो पुगेर सामाजिक सञ्जालमा आफ्नो चरित्रहत्या गर्नेविरूद्ध उजुरी दिनुभएको थियो । त्यसमध्ये एकजना समातिएको अवस्थीले जानकारी दिनुभयो । 

पक्राउ परेका राई कवि पनि हुन् । नेपाल प्रज्ञा प्रतिष्ठानले हालै आयोजना गरेको राष्ट्रिय कविता महोत्सवमा उनी शीर्ष २५ स्थानमा पुगेका थिए । एलिनाले अभद्र र अश्लील कमेन्ट गर्नेहरुको कमेन्ट र म्यासेज सामाजिक सञ्जालमा सार्वजनिक गर्दै आउनुभएको छ ।