काठमाडौँ । राष्ट्रिय स्वतन्त्र पार्टी (रास्वपा)ले प्रतिनिधि सभा बैठकमा आज पनि वेल घेराउ र नाराबाजी गरेको छ। 

प्रतिनिधि सभा बैठक शुरू हुनेबित्तिकै रास्वपा र राप्रपाका सांसदहरुले उठेर विरोध जनाएको थियो। त्यसपछि सभामुख देवराज घिमिरेले रास्वपाको सांसद असिम साहलाई बोल्न समय दिनुभयो । सांसद साहले भिजिट भिसा प्रकरणमा गृहमन्त्री रमेश लेखकमाथि छानबिनको माग गर्नुभयो । 

उहाँले मुलुकमा ‘लुटको सिन्डिकेट’ खडा गरिएको आरोपसमेत लगाउनुभयो । 

त्यसपछि सभामुखले राप्रपाका सांसद धवल शमशेर राणलाई बोल्न समय दिनुभयो । उहाँले गत चैत १५ गते तीनकुनेमा राज्यकै कारण दुई जनाको मुत्यु भएको र निजी घरहरूमा तोडफोड र आगजनी भएको आरोप लगाउनुभयो । 

राप्रपाका सांसद राणा बोलिसकेपछि रास्वपाले वेल घेराउ र नाराबाजी गर्न थाल्यो। प्रतिनिधि सभामा अहिले बजेटमाथिको छलफल भइरहेको छ।