काठमाडौँ । गत चैत १५ गते भएको तीनकुने घटनाका आरोपी रवीन्द्र मिश्रलाई ३ लाख धरौटीमा रिहा गर्न आदेश भएको छ । काठमाडौ जिल्ला अदालतकी न्यायाधीश तारादेवी महर्जनको एजलासले उहाँलाई ३ लाख धरौटीमा छाड्न आदेश गरेको हो ।

राप्रपाका वरिष्ठ उपाध्यक्ष समेत रहेका मिश्र आज आफैं अदालत उपस्थित हुनुभएको थियो । सोही घटनाका आरोपी राप्रपाकै महामन्त्री शवलशम्शेर राणा सोमबार अदालतमा उपस्थित हुनुभएको थियो । र, उहाँपनि ३ लाख धरौटीमा रिहा हुनुभएको थियो । 


धरौटीमा रिहा भएसँगै सांसद राणा आज संसद् पनि उपस्थित हुनुभएको थियो । 

मिश्रविरुद्ध यही जेठ ११ गते राज्य विरुद्धको कसुर, आपराधिक उपद्रव, सङ्गठित अपराध र एकीकृत कसुरमा सजाय हुन माग दाबी गरी मुद्दा दर्ता भएको थियो ।

गत चैत १५ गते राजावादीले आयोजना गरेको प्रदर्शन भड्किएर हिंसात्मक बनेको थियो । २ जनाको मृत्यु हुने गरी भएको घटनामा मिश्रले उत्तेजक अभिव्यक्ति दिएको आरोप लागेको छ ।