काठमाडौँ । अष्ट्रेलियाका लागि नेपाली राजदूत चित्रलेखा यादवले ओहोदाको प्रमाणपत्र प्रस्तुत गर्नुभएको छ । राजदूत यादवले आफ्नो ओहोदाको प्रमाणप क्यानबेरामा आयोजित विशेष समारोहमा त्यहाँका गभर्नर जनरल  साम मोस्टिनसमक्ष  प्रस्तुत गर्नुभएको हो । 

ओहोदाको प्रमाणपत्र प्रस्तुत गरेपछि राजदूत यादवले  गभर्नर जनरलसँग शिष्टाचार भेटघाट गर्नुभएको छ । त्यस अवसरमा राजदूत यादवले  नेपालका राष्ट्रपति रामचन्द्र पौडेलका तर्फबाट  शुभकामना व्यक्त गर्नुभएको क्यानबेरास्थित नेपालको राजदूतावासले जनाएको छ । राजदूत यादवले राष्ट्रपति पौडेलका तर्फबाट गभर्नर जनरललाई नेपाल भ्रमण गर्न आमन्त्रण गर्नुभयो ।

गभर्नर जनरल र नेपाली राजदूतबीच नेपाल–अष्ट्रेलिया सम्बन्धका विविध पक्षका साथै  साझा हित र चासोका विषयमा विचारविमर्श भएको थियो । पारस्परिक समझदारी, विश्वास र सहयोगमा आधारित द्विदेशीय सम्बन्धलाई अझ सुदृढ तुल्याउन क्रियाशील रहने प्रतिबद्धता राजदूत यादवले व्यक्त गर्नुभएको दूतावासले जारी गरेको विज्ञप्तिमा उल्लेख छ । 

ओहोदाको प्रमाणपत्र प्रदान समारोहमा अष्ट्रेलिया सरकारका उच्चपदस्थ अधिकारी र नेपाली दूतावासका कर्मचारीहरूको पनि उपस्थिति थियो ।