कञ्चनपुर । शुक्लाफाँटा नगरपालिका–१० झलारी बजारमा पाँच दशकअघिदेखि रतन जैरुले सिलाइकटाइको काम गर्दै आउनुभएको छ । यही पेशाबाट उहाँको जीविकोपार्जन हुँदै आएको छ । 

डडेल्धुराको खलङ्गाबाट ५५ वर्षअघि जैरु तराई झर्नुभएको हो । अहिले ६९ वर्ष पुग्नुभएका उहाँले भन्नुभयो, ्‘पहाडमा जीविकोपार्जनमा समस्या हुन थालेपछि रोजगारीको खोजीमा तराई झरेको हो ।’ तराई झरेको केही वर्षसम्म सङ्घर्षपूर्ण जीवन बितेको उहाँले सुनाउनुभयो ।

‘पहाडमा हुँदा अलिअलि सिलाइकटाइ सिकेको थिएँ । तराई झरेपछि अरूको पसलमा मेसिन चलाउँदै गरेको, कपडा काट्दै गरेको कार्य हेरिरहन्थेँ । त्यसबेला म १५ वर्षको थिएँ’ जैरुले भन्नुभयो– ‘हेर्दाहेर्दै मेसिन चलाउन, कपडा काटन सिकेँ । कपडा सिलाइ गर्ने पसलमा काम पाएपछि मेसिनमा कपडा सिलाउन थालेँ, बिस्तारै सिकेको सीपले अहिले सक्षम बनाएको छ ।’

सीप निखार्न भारत भारतको बरेली पुगेको अनुभव जैरुले सुनाउनुभयो । ‘बीस÷बाइसको कलिलो उमेर थियो, बरेलीमा ‘टेलरिङ’ गर्ने पसलमा बसेर एक वर्ष काम गरेँ । काम गर्दै जाँदा सीप पनि सिकिँदो रहेछ’ उहाँले भन्नुभयो– ‘पाइन्ट र सर्ट बनाउनमा निपूर्ण भएपछि आत्मविश्वास पनि बढ्दै गायो ।’ उहाँले त्यतिले व्यावसायिक सिलाइकटाइ गर्न नपुग्ने ठानेर कोटपाइन्ट, सुट बनाउने सीप सिक्न विसं २०३४ मा भारतको लखनऊ पुगेको स्मरण गर्नुभयो ।

दुई वर्ष लखनऊमा बसेर जैरुले कोटपाईन्ट बनाउनमा दक्षता हासिल गरेपछि स्वदेश फर्किएको बताउनुभयो । एक वर्ष महेन्द्रनगर बजारमा अरुको पसल अगाडि बसेर सिलाइकटाइ गरेको सुनाउँदै उहाँले विसं २०३७ देखि झलारी बजारमा सिलाइकटाइ पसल राखेर काम थालेको उल्लेख गर्नुभयो । 

हालसम्म यही पेशालाई निरन्तरता दिएको बताउँदै जैरुले अहिले झलारी बजार क्षेत्रमा कोटपाइन्ट, सर्टमा सबैभन्दा राम्रो ‘फिनिसिङ्ग’ दिने टेलरका रुपमा परिचति भएकामा खुसी लाग्ने गरेको सुनाउनुभयो । ‘पहिला बजार क्षेत्रमा सिलाइकटाइ गर्ने प्रतिस्पर्धी थोरै हुँदा आम्दानी प्रशस्त थियो’ उहाँले भन्नुभयो– ‘महिनाको  ५०÷६० हजार रुपैयँँमाथि कमाई हुन्थ्यो, अहिले बजार बढ्दै गएको छ, उमेरले पनि पहिलाको जस्तो साथ दिँदैन ।’ अहिले मासिक  ३० हजार रुपैयाँसम्म आम्दानी हुने गरेको उहाँले जानकारी दिनुभयो ।

जैरुले चार बहिनी, पाँच भाइको विवाहका साथै दुई छोराको सबै खर्च सिलाइकटाइबाट भएको आम्दानीले गराउनुभयो भने झलारी बजारमा घर र घरेडी जोड्नुभएको छ । सीप सिकेर आत्मनिर्भर भई व्यावसायिक रुपमा काम थालेपछि पैसाको कहिल्यै समस्या नपरेको अनुभव उहाँसँग छ । सीप सिकेर लगनशील भई कार्य गरे आत्मनिर्भर भइने उहाँको बुझाइ छ ।